37歲「石修仔」陳宇琛(Sam)去年7月求婚成功後，今年2月娶有線前主播林佑蔚(Camille)，喺教會牧師見證下，舉行註冊儀式(新聞連結： http://bit.ly/2uu4gA0 )，不過正式婚禮就定喺今個月7至9號於蘇格蘭舉行，邀請約50幾個親友到場觀禮，同時喺古堡內影埋婚紗照。

同行嘅化妝師Melody噚晚8點幾喺Ig貼咗一啲古堡相，原來「石修仔」陳宇琛揀咗喺蘇格蘭愛丁堡Carlowrie Castle影相，當中有一張見到太太Camille蹺住陳宇琛右手行草地，婚紗着番之前行禮時嗰套，大deep V露出事業線，新娘子低頭露出幸福微笑。

二人婚宴將於出年初喺香港擺酒，不過暫時佢哋就未想生B住。睇嚟老爺石修要等多一等喇!