前日（2日）係朱晨麗（朱朱）31歲生日，佢之前因為拍劇集《多功能老婆》，同楊千嬅、陳煒成為好姊妹，噚晚佢哋同朱朱慶祝生日，同場仲有周柏豪。慶祝生日之餘，佢哋仲拍咗條片，幫陳煒做視后拉票。

片中個個都變晒卡通聲，陳煒做番角逐視后嘅劇集《宮心計2深宮計》入面角色「太平公主」，而楊千嬅就化身「春嬌」，朱晨麗係「春朱」，至於周柏豪就做太監。千嬅演嘅春嬌問太平公主︰「想食乜嘢？」但就被霸氣嘅太平公主陳煒話佢︰「春嬌我教咗你，行禮係咁行嘅咩？」之後輪到朱晨麗演嘅春朱出場，被太平公主話佢︰「壓死我啦春朱，你以為我係皇帝，你色誘我係咪呀！冇心情食嘢呀。」

陳煒夠晒七情上面扮嬲，此時千嬅召喚太監小鮮肉周柏豪入鏡，陳煒問周柏豪叫乜名，佢口窒窒話︰「我叫春pocket。」但就畀千嬅搶先講︰「spring pocket。」個個笑到接唔到下一句，千嬅問周柏豪搞乜？周柏豪話︰「搞緊出面啲人投你（陳煒）票囉，投《萬千星輝》…」未講完，已經畀千嬅同朱晨麗搶住話︰「投最佳女主角，係咪。」周柏豪仲話︰「原來我都有份。」千嬅就叫佢︰「陣間先講，退下。」此時千嬅已經笑到趴喺陳煒身上，之後陳煒開心攬住兩位好姊妹。

精選娛聞，喺晒《娛果》
http://fb.com/appledailyent