當年今日
關於我們

蘭西情報課:濠江代理好搵多過警察

蘋果日報 2005/03/17 08:00


中記澳門分行,唔夠半年已經有盈利,中原(澳門)執董郭朝隆話,𠵱家共有百五名員工,前線佔百二,前線平均每月收入已逾兩萬,希望今年可以升到兩萬五至三萬。
咁嘅月薪,香港人都覺得唔錯,澳門當地人就更加羨慕啦!畀啲例子大家睇吓就知嘞,好似入行一兩年嘅交通警,月薪係萬零蚊,酒樓部長五六千;當地人平均月入係六千至八千。𠵱家代理業已經同政府公務員及賭場荷官,成為三大高薪行業。
郭朝隆話,代理李倩熹,入行四個月,憑住夠勤力,上個月促成十七宗成交,生意額三十八萬,個人月入十一萬,成為最好數前線。另一前線周國榮,上個月促成十一宗,營業額三十五萬,都有逾十萬收入。
另一個剛畢業前線,上月做到兩個舖位,已經有六萬一千收入。

杜麗莎租加州花園
唔少名人都愛擇居獨立屋,可能貪獨立屋嘅空間夠大、私隱度較高。著名女歌手兼歌唱教師杜麗莎,聽市場人士講,啱啱租咗元朗加州花園一間紅花徑雙號獨立屋,月租大概兩萬蚊。
間屋有成二千零十四呎,重連一千六百呎大花園,屋內外空間都夠晒大,四周環境夠寧靜,頗適合藝人居住。
聽美聯物業張子存講,加州花園係區內較具規模嘅獨立屋屋苑,向來受唔少愛靜人士追捧。屋苑今個月至今有成十六宗買賣,租務成交四至五宗,都算活躍。
恒通中心三標競投
酒店渴市,恒通資源趁勢標售筲箕灣恒通資源中心,噚日截標,收到三份標書,戴德梁行負責招標,發言人話,業主一個禮拜內會有決定。
佢早前話過,有投資者出價億五洽購,呢個買家結果都有入標,至於係咪就係佢出價一億五,就要賣住關子先。
呢幢樓原本係工業用途嘅附屬性寫字樓,佔地約一萬呎,總面積十二萬五千呎,以億五元計,每呎要成一千二百,附近嘅工業樓重未做得到。
不過,幢樓勝在可以轉做一百九十間房嘅酒店,連建築圖則都已經批准埋。現時酒店需求咁大,花幾千萬改裝費,就可以身價大升,投資者有得博吓,再唔係,索性重建都得。

宇晴軒復活節開盤
市道好,發展商賣樓歎慢板,唔少發展商今年重未大舉出擊。好似長實咁,今年初主力賣東涌悅濤軒後,原本諗住開賣大坑名門,又未有售樓紙,迫住變陣。
長實高級營業經理郭子威話,長沙灣宇晴軒第六座,原定第三季先賣,會提前復活節檔期推,全幢三百伙,但會保留半數,明年現樓至賣。舊年宇晴軒第一座呎價五千五百,預計第六座比第一座有一成至一成半升幅。
同系畢架山一號,今年以來,賣咗十五間,套現三億,重有二十五個未賣。噚日就同香港置業合作,向首兩名買家,送七成樓按首年延期還本,送首年管理費,同埋差餉等優惠,價值約二十萬。長實同時推出三個一千五百幾呎大單位,加價百分之五,每呎一萬一千五百,四月二日發售。
電郵地址:[email protected]