本欄前幾日問過一個問題:孖展喺內地係新事物，2011先有；內地又有跌停板機制，如果孖展斬唔到倉，到底會發生咩事，真係好難知，因為人類歷史上從未發生過。不過，答案就喺尋日揭盅咗：阿爺一定唔會俾佢發生！華爾街有投行大到不能倒，中國亦有孖展股大到不能跌，如果阿爺底牌咁樣俾人睇穿，真係可以成為包贏錢方程式。

內地孖展通常跌三成就要call孖展,叫客人補倉；跌到四成就會強制斬倉。即係話，如果一隻股連續三日跌停，就會好大鑊，觸發人踩人，開始火燒連環船。要留意嘅係，如果連日跌停，通常會有價冇市，股價跌入無底深潭。

以上所講嘅，係一般個股，但如果有隻股份嘅孖展額，大到連阿爺都承受唔到冧市嘅後果，你估會點呢？中信證券A股而家孖展額超過三百億人仔，全部十九隻券商股超過一千億，如果一冧，絕對會大鑊過雷曼爆煲。

所以喺尋日中信証券連續跌停兩日後，連新華社都要出來救市，絕對不容許出現第三個跌停。事實上，喺近期根本冇出現過券商股連續三日跌停情況。喺戰友角度，如果券商股連跌兩日，一定係入市良機，因為阿爺冇得選，一定會救市。信不信由你。

記者：黃尹華