日前麥明詩(Louisa)做節目遊母校劍橋，因無限loop「劍橋」，網民鋪天蓋地話佢離地，呢個時候，Louisa身邊即時出現多位護花男，除咗男友林作撐佢，仲有洪永城同「鴨王」何浩文（Dominic）都出口力撐呢位10A港姐。

呢排因為拍王晶新劇同Louisa日對夜對嘅Dominic，除咗喺facebook撐女方貼地，仲踢爆劇組刻薄Louisa，話佢喺場地呆等9粒鐘，又要同劇組食同色飯盒，最大鑊係被安排同大陸臨記一齊坐車，焗住聞臭汗。不過Dominic就話自己一見到Louisa，會同佢搞吓爛gag，等對方可以苦中作樂咁話。

Dominic對Louisa連番出招大獻殷勤，來勢洶洶，出口術之餘，仲試過趁女方喺車上瞓着，摸佢手仔。

作為Louisa正印，究竟忍定唔忍？林作今日喺電話中，就話想約Dominic出嚟切磋吓，大家講吓追女心得咁話喎:「其實靚女自然多人追，Louisa有同我講過話何生(Dominic)係一個唔錯嘅搭檔，其實如果何生唔介意，我都想約佢出嚟交流吓對女仔嘅心得，我仲想請佢做我專欄嘅嘉賓。」咦！好似聞到有啲味喎！

問林作會唔會介意對方摸女友手仔？林作話：「唔介意，其實肉體接觸我睇得好淡，摸吓手我覺得好小事啫！」