當年今日
關於我們

【短片】楊千嬅何超蕸打氣野孩子行衰運僅敗

蘋果日報 2014/06/11 06:00

楊千嬅何超蕸打氣野孩子行衰運僅敗

師傅贏馬,徒弟疑似打茅波幫手!呢晚第三場由吳定強之「喜逸」放頭,此駒拉士一度看似力弱,一對追兵「明目張膽」同「野孩子」有機會將佢追過,「野孩子」在吳定強徒弟賴維銘胯下,大半條直路將「明目張膽」封住冇位出,到「明目張膽」望空之際,「喜逸」已經到終點,以短距離擊敗「明目張膽」爆冷取得季內第二捷,今季贏完谷草再贏田草,吳定強訓練呢匹腳患馬都算交足功課,家陣只差兩W就可以畢業,問題應該唔大。
反觀「明目張膽」影相飲恨做阿二之餘,更令布文中三元落空!其實賴維銘陣上封馬早有前科,早排佢被罰停賽七日,正係因為騎「金鹿」沿途啄住郭能隻「獅鷲」被判犯規,「金鹿」之後轉配潘頓連贏兩場,堪稱馬場奇遇記!
講番今場季軍「野孩子」,直路封住「明目張膽」,造成兩敗俱傷,益咗「喜逸」偷雞得手,「野孩子」馬主黃淑貞之媳婦歌星楊千嬅,呢晚着到靚一靚,仲專登帶埋好友賭王二房千金何超蕸到場打氣,最終冇頭馬拉,千嬅唔失望就假!