年尾好多人都鍾意搵風水師傅睇吓層樓執吓位，睇吓來年邊個位最旺財。除咗自己住緊個單位，整幢物業風水好壞都可能有好大影響，噚日有網友喺《香港討論區》談論邊個屋苑出名好風水。
ger@280話係華富、北角，maow就話係太古城，韓諾選沙田帝堡城，其他入選嘅仲有沙田穗和苑、青龍頭豪景花園、深井浪翠園、咖啡灣海景花園、大坑勵德村。另外，dirty789提名昇悅居，佢嘅理由係，「最近有個統計，超過90%賣盤都係賺錢嘅！」
不過最多人講嘅就係美孚，大長春有根有據咁話：「美孚出晒名好似聚寶盆，好多有錢佬喺度發迹。」katy02112003和應，話有電影明星同紡織廠老闆之前都係住嗰度。larry2046就話：「係呀，我以前都聽聞美孚嘅風水係好好㗎。不過，近呢幾年啲人話地運轉咗，美孚嘅風水已大不如前，唔知堅定流呢？」

趙國雄首次置業地點

翻查資料，兩大地產代理之一美聯物業就係喺美孚新邨發迹，另外，有長實樓神之稱嘅趙國雄，前年接受報章訪問時話，第一層買嘅物業就係美孚新邨，當年樓價只係20幾萬銀。