諸葛紫岐(Marie)同Neway二少薛嘉麟3年前結婚，個仔薛華轁亦差不多2歲，但近日就驚傳兩人婚變，Marie自上月初出席活動被發現暴瘦，當時佢話老公「唔覺得我瘦係咩一回事」，已露婚變端倪。

直至近日兩人仲喺微博互數，Marie一時話「家家有本難唸的經」，一時又話「看穿別人的虛偽」，之前佢公司開張搞活動，記者問嘅都係關於佢婚變嘅問題，佢索性喺微博話:「我公司開張大家都很關心薛嘉麟先生到否，他到與不到都改變不到星轁發展的工作運行。」搞明當老公冇到。

而薛嘉麟前幾日亦喺微博發咗一大段文似意有所指，個故事話有「老婆拋棄丈夫，重新選取認為愉悅的路」，「現代女性不再是以前的家庭主婦，想事業，感情，婚姻，家庭四者兼得。」

今日有周刊嘅爆料人士就指，Marie同老公最大分歧主要在於女方一心一意想做女強人，以往女藝人生完B就係專心相夫教子，但Marie視生B係完成歷史任務，所以呢排佢就好多大計，開公司一下子就去到北京同新加坡擴充，但薛嘉麟其實對娛樂圈生意冇興趣，知情人仲話Marie嫌老公阻佢大展拳腳，而家兩公婆仲冷戰緊，見仔都係分開見。

而兩人婚後本來係住喺近男家嘅沙田九肚山獨立屋，但Marie開公司以來經常中港兩地走，佢免得惹老爺奶奶閒話，就以個仔嘅校網為由，搬咗去跑馬地，而薛嘉麟就甚少出入跑馬地新居。而前日周刊影得Marie出席旗下藝人生日會，左手無名指上已經冇戴婚戒。