「香港呢兩個字變得好淡，好香港嘅事越嚟越少，生活上法治、價值觀、人情味都好似慢慢唔見，當時我就諗， 有無一樣嘢係一做就人人皆知係香港？」

即Like全新飲食專頁【籽想好食】｜fb.com/food.appleseed/

「食。」向上望幾乎成四十五度的斜路上，有一所快將清拆的公廁，行入旁邊小里，穿過盆栽，在里的盡頭是另一個里。

四十多歲的張呈佳 Michael在那百年石牆樹下，開了茶咖里這餐廳，他說是一處港式茶記聯乘西式餐廳的地方。「香港人又鍾意飲咖啡，又喜歡食丁麵，到底咖啡點樣可以香港化、丁麵又可以點西化，所以我試吓將兩件事放埋一齊，想話畀人知，茶餐廳都可以進步，改變唔一定要鬼五馬六，可以又fusion又好食。」

以為在港島區歎杯啡必定40元起跳，這裏出奇地還是2字頭的價錢。「我哋係賣食物，唔係賣租金、branding。不過有時租金同物價都真係幾難頂，咁咪唯有香港精神，賣多啲，薄利多銷，不過都好多開心一直都有唔少街坊支持。」店內採用了公平貿易的茶包與糖包，卻不藉此收貴點，是為了公平二字。「成本高了就轉介到客人身上，其實顧客都需要一個公平對待，所以公平貿易喺多方面都需要公平， 如果偏向某一方面就係不公平嘅現象。」

最出名要數那杯在公雞碗內的Lattle，外國用Latte bowl，香港就用地道的公雞碗；又記起菠蘿包是另一香港地道特色，配合手打牛肉，製成菠蘿包手打牛肉漢堡。店內吧枱高處，放了一樽樽的地道米酒，要是日本的清酒可以打出名堂，那香港的又可以嗎﹖玉冰燒流進白色酒瓶內，再配以小型公雞杯品嘗，過往的佬味也許能被重新演繹。

從前在這邊讀中學的Michael， 離開了又回來，現在女兒在這邊讀書，家、舖也在此，記住的是那種社區與人的連結。

「我始終都係呢度長大，好多回憶。二十年前行過呢條路，二十年後仲喺度。其實呢邊係有個故事、歷史的味道重啲，仲有小區嘅味道。」店內的東西壞了又不懂維修，便走上一條街問那五金舖的老闆；下班買餸回家，走過店對面的街市，賣魚的、賣菜的早就成了朋友。

連結是雙向的，社區吸引了他回來，他也想回饋社區。「社區使命感係好基本， 唔理佢幫襯你，唔幫襯你，佢都係社區一份子。」西環的茶咖里設有飯券，首批派了200張，讓有需要的人士吃一餐。當不少人關心新界、九龍的貧窮人口時，表面風光的港島區，也有不少長者只能勉強靠積儲過活。「飯券無特定菜式，有咩就煮咩，當然係有菜有肉有飯。」訪問當日近關店時有位老伯來換飯盒，他想吃飯，剛好店內的米飯售罄，店員特意重新烹調。

「其實做呢件事有啲似我嘅贖罪券，當時仲喺柴灣舊舖時，發生興民邨件事，我哋就有呢個諗法去幫班老人家，但無奈計劃未開始，我哋間舖就續唔到租。」舊舖位於柴灣體育館內， 舖位三年一次投標，那次Michael投標失敗，於是搬到港島西區。「我最後留咗二百份飯券麻煩區議員幫手派，但我都無能力再做咩，畢竟我都離開咗；所以今次我想盡快開始，做得再好啲，再大啲 。」
雖說中西區能保留的舊物較多，似乎隨便一座大廈都有數十年的歷史，但面對無情的又越來越急速的變遷，能留多久都是未知數。「 依家嘅香港越嚟越唔似我以前識的香港，但我真係好回味嗰種你幫我，我幫你嘅時期，所以唯有繼續自己做好啲。」

茶咖里Congteakafe
西環西營盤爹核里4號地舖

採訪：梁苡珊
攝影：吳煒豪