𡃁模羅彩玲(Vivian)噚日由經理人向展邦陪同喺觀塘開記者會,澄清唔係周秀娜同男友陳偉成(Avis)之間嘅小三,唔認搞散佢哋嘅6年情。Vivian唔單止唔厭煩咁解釋,仲見記者就派佢本上年出嘅寫真,一啲都冇嘥料。講番同Avis張床照,Vivan話真相唔係咁,只係大家飲醉酒瞓喺梳化,朋友影咗放上facebook,事後已經刪除晒啲相。Vivian話佢哋分手唔關佢事:「佢哋冇聯絡見面,感情好難維繫。」覺唔覺得Avis有心追求?Vivian話:「我唔識答,我哋真係冇一齊過。」點解合照流出街?Vivian解釋:「可能佢哋分手,傳媒四處搵料。」