林夕早前改編佢填詞嘅《約定》入面一段歌詞，送畀流亡倫敦嘅前香港眾志主席羅冠聰，憑歌寄意祝對方安好，仲一度上演無知網民鬧林夕不尊重原作者嘅鬧劇。夕爺之後再於ig分享整首改編版本，而收到夕爺心意嘅羅冠聰，日前睇到香港又發生大搜捕，令佢有感而發，於是又將夕爺嘅《約定》重新填詞，填咗羅冠聰版嘅《約定》，仲親自唱埋。

羅冠聰前晚喺社交平台上載一條由佢填詞嘅《約定》自唱版本，佢身穿便服，拎住平板電腦低頭淡淡地唱，中段時有小小走音，當唱到副歌部份，佢感觸起嚟抬高頭唱。短短近三分鐘嘅獨唱，佢顯得無奈傷感，唱到最後一段「若有天戰勝哀愁 不問天氣 兩鬢斑白 香港再等你」，他就向着鏡頭微微一笑。

羅冠聰喺貼文寫，因為某夜晚飯後，佢決定將呢啲文字以聲畫記錄低，話一剎即永遠，仲話見香港局勢惡劣，「並肩作戰良久的戰友身陷囹圄，希望將這首歌送給他們，以及每位在艱難時期仍然挺身而出的朋友，會再見的。」又補充由於係興之所至臨急拍攝，冇準備好，所以表現同影片質素唔太合格。

條片到噚晚已有1.4萬人讚好，有網民留言「你咁㗎，唱到走晒音搞到我眼濕濕」，羅冠聰回覆「真係臨急臨忙錄…」。另外有不少網民給予鼓勵支持，又叫佢有時都要學放輕鬆點，咁先走得更長更遠啊！

李八方