繼張學友被封為「逃犯剋星」，過去兩個多月有5名逃犯睇騷被捕，台灣天王周杰倫都唔執輸成為「逃犯殺手」，噚日有一名逃犯睇周董「地表最強」福州站巡唱被捕後，竟然唔係求警察放咗佢，而係哀求：「能不能看了我倫的演唱會再關進去啊！」

今次周董到福州舉行兩場巡唱，噚日係第一場，早上警察到賓館進行日常巡查，喺某間房內發現一名姓何男子神色緊張，警察對其身份進行核查，發現何某因涉嫌非法侵佔，於今年4月被廣東警方網上追捕，福州警方即時遞捕何某。

當何某被帶返警局後，竟然不斷哀求：「能不能看了我倫的演唱會再關進去啊！」原來佢同女友都係周董嘅死忠粉絲，鍾意咗周董十幾年，為咗今次福州站巡唱，佢一早買咗門票，同女友由廣州趕到福州睇偶像，點知啱啱入住賓館即被捕。

原來周董是第二次「幫」警察拉到逃犯，14年周董在合肥開騷時，警察捉到一名姓洪疑犯，佢冇後悔因睇騷被捕，仲問警察可唔可以畀番門票佢作為紀念：「自己已經聽完周杰倫的歌了，滿足了。」

精選娛聞，喺晒《娛果》 http://fb.com/appledailyent