體壇拾趣:首位港人登陸葡甲
歐冲‧圓夢
體壇拾趣
歐陽耀冲成功摘「葡萄」!上月底自費去歐洲試腳嘅「神之子」歐陽耀冲,經過近一個月嘅努力終於有回報,葡甲球隊葡萄牙體育會周五喺官網正式宣佈簽入呢位前港腳,成為首位登陸葡甲嘅港產華將!
歐陽耀冲上月底獲港超聯球隊YFC澳滌(前身為橫濱FC(香港))通融,自費去到荷蘭隨當地甲組隊NAC試腳,希望達成喺歐洲落班嘅夢想。雖然最後唔成事,但歐冲並冇放棄,轉赴葡萄牙繼續追夢,結果亦皇天不負有心人,獲葡甲嘅葡萄牙體育會錄用,周五仲喺官網正式宣佈,呢位前港腳將會着上代表佢出生年份嘅89號球衣。
成為首位登陸葡甲港產華將嘅歐冲,儘管一直保持低調,但前東家澳滌教練李志堅,噚日領軍喺跑馬地球場友賽,以1:0擊敗港甲嘅公民,得悉消息後都戥呢位小將高興:「雖然歐冲仲未正式通知我,但佢較早時間已聯絡過我,我哋亦發咗轉會紙畀佢,批准佢轉會。我喺度都恭祝佢,始終有球員能夠出外,對香港足球都係件好事,希望佢繼續努力,為港爭光!」
至於噚日隨公民跟操、曾經喺葡超「搵食」嘅迪天奴,知道前南華隊友歐冲登陸葡甲,雖然就唔多睇好,但亦希望佢唔好輕言放棄︰「葡甲嘅水平高香港好多,比賽速度高及體力化,唔少球員有好似我咁嘅身形,歐冲未必頂得順。但歐冲腳法唔錯,我都希望佢可以一直堅持落去,長遠計對香港足球都有益處。」
除咗「野人」之外,歐冲昔日效力華家堡嘅恩師李健和,都唔多睇好「神之子」︰「一個香港球員,有咁容易喺歐洲踢咩?你憑咩先?一來身形又唔好;唯一好處就係見識到歐洲球隊嘅態度同踢法。做人最緊要清醒,夢想還夢想,現實還現實,做職業球員都要搵食。」雖然和哥講得有火,但佢都有補充,「我都希望佢可以成材,他日踢葡超士砵亭、波圖。」
葡體會暫時喺24隊嘅葡甲中排18位,要「升呢」踢葡超可能太長遠,但隊波周六就會作客第5嘅唐迪拉,歐冲話唔定仲有機會首次上陣㖭。
識睇,一定係睇足英台【英波Live】:
http://soccer.appledaily.com
http://bit.ly/engballlive