韓劇《急診男女》嘅44歲男星李必模近日出演TV朝鮮節目《戀愛的味道》，節目中同嘉賓徐秀妍喺節目內談戀愛，兩人由一開始已對雙方產生好感，亦因為節目而擦出愛火，噚日有報道指二人確認彼此心意後決定明年結婚，獲粉絲及觀眾送上祝福。

李必模噚晚喺釜山進行音樂劇《那些日子》嘅演出，謝幕時，李必模更邀女友到台上，當眾求婚，相當浪漫。李必模說道：「其實我有一個夢想，如果要迎接某個人走入我嘅人生，我一直希望可以喺呢個劇場度向佢求婚，今日可能就係呢一日。」台下觀眾已經歡呼聲不斷。而女友上台後，李必模送上花，隨即拎出戒指，令女友感動到喊，兩人更深情攬攬。至於《戀愛的味道》將於聽日播出李必模及女友嘅特輯，公開兩人甜蜜嘅戀愛過程。

精選韓流，喺晒《娛果》
http://fb.com/appledailyent