當年今日
關於我們

【老友鬼鬼】俾CCC尼寸爆 韋舒亞反撃:就係你累到我地冇聯賽盃

蘋果日報 2017/09/22 19:30

英超韋舒亞阿仙奴施捷斯尼施捷施尼

好耐冇為阿仙奴上陣嘅英格蘭中場韋舒亞,周三終於獲得正選機會,喺聯賽盃出戰唐卡士打,佢仲健健康康咁打足全場,令一眾阿迷非常振奮。韋舒亞嘅老友施捷斯尼(CCC尼)為咗贈興,周四就喺個人IG po咗對方張「私密照」。嗰張相係韋舒亞16歲嗰時影嘅,CCC尼仲好抵死咁加咗句「嗰陣時嘅你(韋舒亞)仲係擅長踢波嗰可?」,寸爆韋舒亞依家走下坡。
而韋舒亞亦都不甘示弱,隨即寸返CCC尼,話「嗰陣就係你累到我地冇咗聯賽盃」。相信不少阿迷都會記得嗰場波,事源阿仙奴喺2011年打入聯賽盃決賽,同當時仲喺英超嘅伯明翰決戰。戰至86分鐘,當時嘅比數為1:1,阿記後衛哥斯尼與CCC尼有誤會,加上哥斯尼解圍撻Q,導致後上嘅伯明翰前鋒馬田斯輕鬆射入,阿記最終以1:2落敗。
CCC尼近年嘅發展其實都唔係太順利,佢之前喺羅馬雖然踢正選,但反而今季去咗祖記做保方嘅後備,出場機會當然唔多,佢恥笑韋舒亞根本係五十步笑百步。當然,韋舒亞同CCC尼咁老友,佢地梗係唔係認真啦!
empty
施捷施尼寸爆韋舒亞。
empty
韋舒亞留言反擊。