韓國神劇《太陽的後裔》嘅宋仲基同宋慧喬去年10月31號拉埋天窗，婚後喬妹同宋仲基就享受二人世界，不時孖住到各地旅行。而婚後兩人都未有新作品推出，但就有拍攝廣告，宋仲基去年12月亦有襲港現身《MAMA音樂頒獎禮》，至於喬妹去年都有飛去北京出席北京國家會議中心舉行嘅中韓經貿合作交流會及國賓晚宴。

而今日係喬妹自婚後首度喺韓國現身公開活動，今日為佢新代言嘅護膚品牌雪花秀喺新沙洞宣傳，喬妹以粉紅色套裝及襯4吋高踭鞋蒲頭。婚後嘅喬妹明顯容光煥發，更喺現場風騷整心心及派心心。
不過唔知喬妹婚後係唔太甜蜜幸福關係，今日佢明顯腰肢圓潤唔少，再次令粉絲期待雙宋嘅愛情結晶品來臨。

更多韓流，喺晒《娛果》
http://fb.com/appledailyent