600字唔夠喉，幸好一圖勝千言。昨日附圖希望可以令淡友醒醒，仍然唔信邪？今日整多張。
此乃某前大行策略員經常掛在嘴邊的「利差模型」，一張圖，夠講十年八載，開幾百場投資講座了。
不要被高深的學名嚇窒，只是一條小一算術題──股息率減借貸利率──而已。股息率高過借貸成本，代表借錢投資有着數。
為方便起見，我今日繼續用一個月本港銀行同業拆息，作為借貸成本的基準。綠色正數位置，顯示股息率高於拆息，3月上旬，股息率一度較銀行同業拆息高逾6厘，而以昨日收市價計算，仍有近4厘息差。
我讀經濟學讀到半桶水，請恕我唔識睇經濟前景，但是單憑這個簡單算式，你話投資者應該擺錢喺銀行做定期享受零息優惠，還是買股票收4厘息了？

供樓收租淨袋2厘

同一道理，本港目前買樓收租收近4厘息，借錢買樓付2厘息，扣除供樓利率，淨袋2厘。不錯，如果經濟再差，債仔斷供被迫賣樓，可能會殃及池魚，只是目前究竟有幾多個債仔孭重債務而已？
然而，投資是否這麼簡單？炒日圓利差交易的，就是用這條簡單公式，早年應用還可以，過去兩年才跟風的恐怕已葬身滙海。
再者，大家可有留意，圖中90年代股息率長期低於借貸利率，股市卻長升長有，而整個2004年息差長期維持於3厘以上，股市卻紋風不動，何解？讀者自己動動腦筋罷。

林少陽
以立投資管理投資總監