中港照相（1123）下個月7號除息，遇正港股橫風橫雨，冷吼一轉呢隻高息股，博財息兼收。中港照相08年度（3月底止）純利4622萬銀，大倒退78%，但派高息回饋小股東嘅政策，一直無變。單係呢轉末期息連特別股息，已經有5.2仙，息率講緊7.5厘，而全年度連特別股息計，息率更加高達13厘，吸引到爆。
中港照相08年度，無好似07年度嘅非經常性收益1.4億銀，亦係純利大插插原因。但要咁睇，香江旅業仍然好景，加埋嚟緊奧運效應，應該支持到中港照相09年度業績，照計集團會keep住派高息。
再講，中港照相每股淨現金挨近0.53元，係現價（0.69元）77%。超級現金牛，防風力又多勝一籌。趁下個月7號除息前，買定中港照相，以NAV0.9元做目標，博轉財息兼收，都幾和味。

香港興業（480）對上10個交易日，清一色陰燭，兼跌咗近25%，日線圖嘅14RSI跌到得番13，嚴重超賣，博轉短打。香港興業08年度（3月底止）純利雖則倒退兩成，到9.24億銀，但股價咁插法，PE跌到得番5倍。再講，集團最新NAV7.5元，現價（3.6元）折讓上到52%，有折讓墊底之餘，相對市值晒士近磅嘅地產股當中，興業夠晒吸引。呢轉博興業超賣反彈，以20%升幅計，價見4.32元，到時，興業嘅NAV折讓仲講緊有42%。