意大利前鋒巴洛迪利（左）喺上周五法甲主場對里爾場波又有波入，協助尼斯喺主場反底贏2:1。巴神今季喺各項賽事已經轟入22球，創咗佢職業生涯單季入球新高。佢嘅經理人拉奧拿就話，巴神下季可能會重返意甲或者英超，仲話以巴神今季嘅表現，身價至少值一億歐元咁多喎。不過各大球會好彩喇，巴神過埋今季就自由身，可以免費轉會。唔知邊間豪門咁好彩「執到寶」呢？