一周兩件呢次主打一門兩傑,第一隻麗豐(1125),絕對係賣大包之列。麗豐最新NAV0.86元,現價(0.103元)折讓高達88%,內房股當中,麗豐折讓係數一數二。
麗豐手頭物業土儲總樓面達到1240萬平方呎。要咁睇,呢期金融海嘯橫風橫雨,但麗豐好多項目將喺後年逐步落成,應該配合到經濟再起飛步伐,物業增值有價。只係保守計數,麗豐土儲每方呎增值50蚊,已經可以為集團帶嚟6.2億銀增值,麗豐最新市值,不過講緊8.2億銀。連埋增值計,麗豐NAV折讓上到近90%,吸引到爆。
再講,麗豐淨借貸比率得11%,而第二大股東嘉德置地(20%權益),係星洲淡馬錫地產旗艦,麗豐有超級大孖沙股東背景,穩陣到痹。呢轉買麗豐,係咁意博翻一番,麗豐價見0.206元,NAV折讓仲高達78%,目標價亦未有耐上番嘉德置地入股成本價0.40元水位。