羅霖今日以股東身份，喺尖沙嘴出席其有份投資嘅美容中心開幕，薛家燕、安德尊、謝雪心、張學潤等均有到場支持。投資咗6位數字嘅羅霖，佢指做生意有固定收入，相比喺娛樂圈發展更有安全感，不過佢話都會兩邊發展，同王祖藍公司完約後，10月1日會同一間新公司有合作。羅霖指開美容心中係自己好大心願，可以分享美容心得，問佢會唔會親自落手做？佢話：「我親自監督。」

講到羅霖為美容中心拍廣告，造型相當性感，佢話：「其實拍之前，我好擔心，因為只得2日時間，好彩我做手術之後，冇胃口食嘢，唔使keep fit，所以因禍得福。」

家燕姐抵達現場後，羅霖感動到眼濕濕。講到佢最近要籌備11月嘅演唱會，由於忙排舞，又要錄影節目，最終搞到麒麟骹（即髖骨）勞損，家燕姐話：「我做咗針灸，醫生叫我唔好行咁多，郁咁多，所以聽日會全面休息。」佢仲又話颱風「山竹」到，會喺屋企食牛肉，又叫fans睇佢入行60年節目特輯。提到呂良偉曾表示可贊助家燕姐減肥，家燕姐話：「我未有時間做，我睇佢咁fit，周身肌肉，冇脂肪，好有型，佢提我唔好飲凍嘢，好傷身體，不過我最近都有練氣功，對跳同唱都有幫助。」

此外，對於有傳無綫嘅婦女節目《都市閒情》喺下月將會摺埋停播，據知由暫名為《Big City Shop》新節目頂替，安德尊表示：「公司話有改革，但點改點變就要等通知，但聽講我哋8個主持全部留低，聽就咁聽啦，但未開任何會，其實做咩節目都會成日變，媒體都會更替啦！」佢認為節目最重要係關乎大眾資訊為主。

精選娛聞，喺晒《娛果》
http://fb.com/appledailyent