李克勤為自己新歌《一個都不能少》MV執導，佢搵嚟多位重量級人馬惠英紅、元華、陳麗雲、劉玉翠、古明華同鄭家生，首次執導MV，克勤坦言心情緊張，花了足足可以拍七個MV的時間來作準備，噚晚更加失眠，今朝零晨四點幾起身化妝出門開工。

今日黃昏佢哋喺牛頭角一個大排檔取景，講述元華開設大排檔，被鄭家生來搗亂，而其餘演員則為元華伙計，克勤希望今次MV有別於以往，所以由最初草擬是飾演惠英紅的兒子，在MV中被小紅姐打面，變成自己只出現MV最後一個鏡頭，而改為小紅姐擔正主角，克勤話：「真係好多謝小紅姐，佢成日唔喺香港，專登抽日半時間嚟拍。」問到是否用人情牌？克勤話：「當然啦，如果唔係點請得起，畀人情價外，拍呢度都幾十萬。」克勤又指演員全是金像獎影后、及最佳男、女配角人馬，可以由佢哋演技來彌補自己導演不足，總之今次係前所未有咁爽，原本計劃兩日拍攝MV，為免明天打風，克勤表示盡量今日內拍完。

日前出席劉德華生日會，問到有冇發覺一家三口變一家四口？克勤話：「我冇八卦，我只係望住主角，都有（同朱麗倩）打聲招呼，真係唔知，仲有其他人去，問其他人。」

已經有一段時間冇喺香港拍嘢，撞啱打風，小紅姐坦言都幾辛苦，不過佢同元華異口同聲指未試過拍MV，所以都想試下玩，元華笑指TV Movie拍過，係未拍過MV同三級片嗰D。小紅姐話：「李導演導得好好，有個長鏡頭係一大班人行，拍得好靚，睇到佢有做足功課。」講到由兩個鏡頭變成主角，小紅姐指唔緊要，不過要記歌詞夾口型就有啲難，原來事前講好唔駛唱，不過今日來到就話要夾口型唱，元華笑住話：「上咗賊船先講數，首歌一開始就唱原來乜乜乜，唓...原來係呃人嘅。」