日本組合CHAGE&ASKA成員ASKA，前日因涉藏毒被捕，日本警方當日去佢屋企搜查，今日就有搜查科人員講及當日情況。

據指當警員入到ASKA住所後，就發現有MDMA興奮劑切成嘅白色粉末，緝毒犬仲喺ASKA書房，搵到幾個細膠袋，入面殘留咗一啲興奮劑粉末。

有日本法律專家指，由於證據充足，但ASKA一直唔認罪，所以佢有機會被判兩年半監禁。

今日傍晚ASKA所屬日本環球唱片公司發表聲明，由於事件嚴重，因此決定同ASKA終止合約，仲回收所有同佢有關嘅CD、DVD等等。

日本好多網民都認為，今次ASKA相信都好難再喺日本樂壇立足。