恒指高低波幅98點,埋單跌42點。短期個市,仍係偏淡少少。
中移動(941)半年多賺26%,中期息62仙,增17仙,另派特別股息9仙(去年冇派)。咁嘅成績表同派送,市場當然收貨,但股價反應則係先升後跌,典型嘅趁好消息出貨,始終年初至今已升41%,有獲利回吐好正常。中移動C輪與P輪,暫時唔適宜買賣,揸C輪驚正股牛皮或回吐,揸P輪則嫌溢價過高。個別仲有兩三個月命嘅中移動P輪,溢價20%以上,將來最大用途係打邊爐之時用嚟墊煲底。
思捷C輪:威水恒指成份股No.1係思捷(330),收64.55元,升3.5%。美林出報告話好,即刻彈升。咦,原來報告出之前,已經先升4日,5日夾埋升幅12%。大行將股票評級調落調升,又有銀彈配合,搵食似乎唔太困難。