大家都想長輩安享晚年，對待狗狗都應該一樣！漁農自然護理署2008年成立檢疫偵緝犬隊，負責喺口岸檢測違禁品，「元老級」偵緝犬、雄性比高犬Archie上年退役，獲領犬員姚士豪收養，喺四口之家頤養天年。

澳洲一見鍾情　諗定收養

現年10歲、2006年喺澳洲出生嘅Archie兩歲起接受工作犬訓練，漁護署當時籌備成立檢疫偵緝犬隊，派出首批領犬員到澳洲受訓，並物色合適狗狗；現任高級農林督察姚士豪係當年首批領犬員之一，同Archie一見鍾情，最終佢哋成為喺口岸把關、偵緝走私活生動物嘅好拍檔。Archie歷年偵破案件達50幾宗，包括2009年初喺機場從旅客行李箱嗅出兩隻被列為高度瀕危物種嘅安哥洛卡陸龜、21隻刺蝟同23隻蜜袋鼯。
姚士豪2011年調職後不時探Archie，原來佢帶Archie來港時已經諗定Archie退休時要帶佢返屋企，連搬屋都會考慮係咪可以養狗，𠵱家一家人相處融洽。漁護署話檢疫偵緝犬隊現有9隻工作犬，署方考慮設立機制，等狗狗退休時安排公眾領養。