噚日《蘋果》率先報道，指蕭定一原本搵咗農夫參演網劇《向西聞記》，但最後疑因無綫伸出無形之手阻止，有指係因為有人想獨攬網劇天下……向蕭定一求證，蕭怒道：「我唔明獨立製作公司，拍電視劇點解TVB可以制止，我覺得係完全窒息香港娛樂圈發展嘅絆腳石。」（新聞連結： http://bit.ly/2oS7LeS ）

今晚蕭定一同有份主演《向西聞記》嘅張繼聰都有份到金鐘出席hmvod宣傳活動，問到仍遭無綫封殺嘅張繼聰有何睇法？佢玩食字話：「我有睇報紙，用對眼睇囉！」又稱：「世事嘅嘢冇得話啱唔啱嘅，我係完全唔關事嘅人，我對工作嘅熱誠未去到呢一步，問邊一個演員做邊一個演員唔做。」

至於無綫嗰隻疑似上帝之手，阿聰笑言：「有形定無形，我唔可以評論到，亦唔可以講咁多。」咁你嗰隻呢？佢就話：「咁又唔可以咁講！農夫係好出色嘅音樂人同演員，亦都係我好朋友，我都好想同佢哋合作。」