AC米蘭新主帥「野人」加度素喺周二接受訪問，話球隊要有「血性」，周日作客「包尾大將軍」賓尼雲圖要當世界盃決賽咁踢。

AC米蘭新主帥「野人」加度素，未帶隊征戰意甲，周二就已經警告球隊如果想重返光輝歲月，一定要先經過慘痛嘅日子。對比前主帥蒙迪拿，加度素擁有「米蘭血統」，佢話執掌「紅黑軍團」對佢相當重要：「我覺得自己好似置身天堂，就好似球員嗰陣一樣。呢個係一個好大嘅責任，我哋要願意犧牲，同埋團結一致，仲要有『血性』。」

而佢都承認呢隊今季買咗11個球員嘅球隊有排執：「呢隊球隊由16個國家嘅球員組成，平均年齡先得21歲，要踢得出色一啲都唔易。」「野人」就話自己唔理球隊依家嘅意甲成績，星期日作客升班馬賓尼雲圖佢一定會搏命：「我當世界盃決賽咁踢架！」賓尼雲圖啱啱喺周一意甲輸波，以連輸14場打破咗五大聯賽歷來最長開季連敗紀錄。所以「野人」今次真係非贏不可，如果唔係佢就會「名留青史」。

----------
係你！打造星級球隊，征服各地聯賽！立即加入『BFB CHAMPIONS 2.0』！
http://bit.ly/2xrTKGM