周秀娜、張繼聰主演嘅新片《女皇撞到正》上映一個星期，口碑都唔錯，不過面對《無雙》有發哥、城城咁大卡士，係打緊逆境戰，導演甄栢榮同一班演員都唔敢鬆懈，連日嚟馬不停蹄到戲院謝票，同觀眾互動。

阿聰同娜姐前晚去到觀塘戲院謝票，佢哋都話呢兩日有見面做宣傳活動，做咗好多謝票，希望票房更加好，見到有場次見紅就會去謝票，娜姐仲笑話：「見到張繼聰都開心啲，佢好搞笑。觀眾見到佢都好開心，因為戲入面我個角色好嚴肅，而佢嘅角色就好搞笑，所以女觀眾見到佢好開心。」阿聰就笑話：「我哋互相分工，自己做搞笑搞鬼嘢，大家出好多心血同熱誠，最近電影市道唔好，集體冒險精神，希望做多啲吸引多啲人去睇戲。」

講到票房，娜姐笑話好似check股票咁睇住，阿聰就話冇特別過問：「反而最近不斷謝票搞到上咗癮，想去埋隔籬院幫人哋嘅戲謝票，噚日就有呢個衝動，係實Q(security)攔住我，叫我唔好咁做。我幫人人幫我，互相幫忙，實現香港人情味，希望城城、發哥可以出現我哋部戲謝票，大人照顧下我哋小朋友。」

而導演甄栢榮就希望網民多啲留言，口碑可以感動更多觀眾入場：「因為作為本土電影，要有更好嘅入座率至能夠獲院線繼續支持排片，同時為香港電影打氣。」

精選娛聞，喺晒《娛果》
http://fb.com/appledailyent