發展局局長黃偉綸經常四圍去，但唔係去行街濕平，而係落區睇下保育問題，日前佢就去咗油尖旺區，參觀咗由市建局負責嘅太子道西及園藝街保育活化項目，油尖旺區議會主席葉傲冬都有陪同考察。上述地方係係香港市區現存最長相連嘅戰前「騎樓」式唐樓群之一，黃局長話經活化後，真係煥然一新，指市建局推行市區更新規劃過程中，保留咗當區社區特色同歷史文化風貌，做到新舊共融喎。

其實上址修復工程已完竣，有關單位亦全部租出，地下鋪頭主要出售鮮花同園藝品，上層單位就係用作商業及文化用途。黃局長留意到，原有商店租戶，上址亦引入新租戶包括非牟利機構同花卉兼容產業等，其中一幢唐樓翻新後仲交畀社聯營運管理，活化成社企生活平台，佢嗰日亦同時探訪兩個社企單位O添。