張可頤今日喺香港仔一間中學出席青協校園活動，睇到班房，佢忍唔住話：「我細個過度活躍症，因為我高坐角落，但成日傾偈，到學期尾我被老師罰坐第一行，記名冊一定有我個名，成日覺得風紀針對我。」

講到上年開咗一間教育中心，除咗設有興趣班外，仲有小朋友及成人嘅情緒班，佢又話：「小朋友由細個已經開始面對情緒，今日同拍檔嚟，因為就快父親節，教小朋友做手工藝，用爛木頭做環保物品、用紅酒木塞整中國象棋，小朋友喺過程中學識情緒平靜，學環保，又可以送禮物畀爸爸。」

問佢細個有冇遇過情緒問題？張可頤直言：「我哋細個年代，冇人識情緒，個個咁窮要捱世界，直至我大個，先發現人生原來有好多嘢要學同衝破，0依家世代好需要情緒教育，我喺人際關係上唔識處理，壓力大又唔識放鬆，以前考試成日都肚痛，因為心理影響生理，父母以為我詐病『你次次都係咁』。」