在大陸旅行期間，經常擘大對眼、伸長對耳，搏命觀察四周圍嘅人，因為實在有好多塑材，可以將來放喺電影入面。一對魁梧嘅北方漢子，不知係因為爭埋單定係爭唔埋單，總之由打開電梯門入電梯開始便一直在嘈，唔止嘈，重郁手郁腳，將幾十蚊推嚟推去，你放入我衫袋內，我截住取出然後又放入你衫袋內，有如京劇中的大耍北派，但其實電梯內早已企滿人，大家惟有一齊左閃右避，避免加入爭畀錢或爭唔畀錢的行列。

另一次在桌球室內，跟友人在傾密偈，突然一支煙頭從我們兩個人頭中間切入，只見一個梳了小爆炸裝的中年皮褸型男，不知為何硬要選擇在我與友人中間的那個煙灰碟質熄煙頭，就在我們還未來得及反應之時，只見他就站在我們距離不足一呎的面前，鼻孔一張，猛抽一口氣，頭一仰，喉間傳來濕濡的爆炸聲。我跟友人彷彿看見一口濃痰的誕生，連忙抽身避開九丈遠，皮褸型男不以為忤，信步走到窗邊，順手打開窗戶，咔吐一聲，濃痰投奔自由，不知樓下有冇人中正頭獎？皮褸型男順便施施然觀賞了一陣夜景，然後再走到桌球枱邊，離枱不足一呎的距離觀賞陌生人打桌球，服務員禮貌地請他讓開一點，他大剌剌地說：「看看不行嗎?!」說罷頭一仰，猛一抽氣，又一口濃痰的誕生，這次他順勢便將痰吐在煙灰碟內，詳情恕不形容，因為實在太核突。
敬告大家若然在內地吸煙，決計不要讓煙碰到煙灰碟，否則……想起也難頂。