【韓流】實至名歸!宋康昊票選封年度演員冠軍
宋康昊逆權司機
韓國統計網站「gallup」於上月8號至28號,進行為期3周嘅調查,統計「年度最突出演員」,吸引1,700名13歲以上嘅網民參加。網站今日公開統計結果,由今屆出爐青龍影帝宋康昊憑35%支持率大熱獲得冠軍。
宋康昊一向係票房保證,近年嘅《逆權大狀》、《思悼》、《密探》都大獲好評,而今年佢主演嘅《逆權司機》,亦係今年唯一一齣突破千萬入場人次嘅電影,而宋康昊喺《逆權司機》嘅表現,令佢入圍及頒獲多個影帝殊榮,於是次調查獲封「年度最突出演員」可謂實至名歸。
至於去年憑《屍殺列車》人氣急升嘅馬東錫,今年主演嘅《犯罪都市》同樣大受歡迎,《犯罪都市》亦打低同時間上映嘅《南漢山城》、《皇家特工:金圈子》等電影,累積687萬人入場觀看,成為2017下半年最多人入場嘅電影。電影受歡迎程度連帶馬東錫由去年嘅第10位,急升至17.8%支持率獲得今次嘅第2位。
去年憑《寒流黑金》成為影帝嘅李秉憲,今年憑《南漢山城》嘅表現獲得12.6%支持率,排第三名;及後第四至第十名依次為黃政民(8.1%)、河正宇及薛景求(6.3%)、孔劉(6.2%)、宋仲基(5.8%)、鄭雨盛(5.2%)、劉海鎮(5.1%)。而女星金惠秀就憑3.8%支持率成為女星第一,但僅排是次統計榜嘅第12名。
更多韓流,喺晒《娛果》
http://fb.com/appledailyent