噚晚《追龍》首映，湯鎮業、黃日華都有出席，湯鎮業仲帶埋一對22歲孖仔到場，黃日華仲搞笑話：「孖仔高大威猛，好過你舊時呀！」問湯鎮業有冇見過華仔囡囡？佢就話華仔都好保護，但就見過黃日華囡囡黃芷晴，仲話覺得佢似媽咪多啲。

提到姪女湯洛雯傳同羅天宇同居？湯鎮業話：「唔理得咁多，後生鍾意乜就乜，都少見，自己同仔住都少溝通啦，仔大仔世界，而且教都未必聽，可能我哋讀得書少，佢哋讀得書多，時代唔同咗。」

講到今次三虎合作好難得，但冇三個人同場，只係各自同華仔有戲。問到私下有冇聚會？湯鎮業就話都少，因為佢都成日唔喺香港，黃日華亦話希望下次有機會三個人同場演戲。

另外，周麗淇（Nikki）喺戲中演子丹前妻，拍三、四日，要素顏演出都係第一次。佢話拍前諗住唔太辛苦，但最凍嗰幾日要拍落水戲，自己又唔識游水，「套戲講我浸死咗，子丹哥好多回憶咁啦！」

Nikki又話：「嚟緊會拍《再創世紀》同安仔（郭普安）好多對手戲，會專心拍，唔會接其他嘢住，遲啲會去布拉格開工。」