英格蘭周一主場擊敗斯洛伐克，穩站世界盃歐洲區F組榜首，直接出線下年世界盃嘅機會高唱入雲，但英軍唔好開心住，因為決賽周種籽排名，取決於國際足協嘅世界排名，英格蘭因為參加太多友賽，宜家只係排第13位，基本上冇咩希望成為第一區種籽。

下屆世界盃由32支球隊角逐，分成8組每隊4隊，頭2名出線16強淘汰賽，除咗東道主俄羅斯，其他7組第一區種籽，都以世界排名嚟排列，講真國際足協世界排名爭議聲音都唔少，事關宜家排第1、第2同第3嘅巴西、德國同阿根廷，算係實至名歸外，瑞士可以排第4，波蘭排第5，就真係有啲名不符實。原來世界排名積分，正式比賽會比友賽拎更多分，英格蘭足總為求收益，安排好多對德國、法國等友賽，間接影響排名。雖然國際足協有意改革排名制度，不過都係下屆世界盃先開始搞，睇嚟英格蘭都要準備以第2號種籽出戰決賽周。