轆Book:
黃德斌×日產Murano 唔扮嘢先Man!
約星試車,聽得最多──「跑車吖!」,再唔係就一大堆名牌:平治寶馬蓮花林寶拉利……明嘅。
打畀黃德斌,「試車?得!後日得!」爽快,試咩車,「日產Murano。」吓?「我真係有興趣。」唔扮嘢先係型:「男人梗係鍾意跑車啦,開快車自己死唔緊要,累到人就唔好!」唔係揸拉利先Man先型嘅,我係邵美琪都冧你啦……《珠光寶氣》入面。
文:嘴嚼爺
攝影:周旭文
連塊面都係四方形,滿面鬚根嘅大隻佬黃德斌,駕着$9,000買番嚟嘅Volvo850Wagon嚟到,架車又係四四方方,車頂加裝咗單車架,實淨又低調,人車襯到絕。「之前揸愛快嘅,買呢架諗住揸去踩單車,揸吓揸吓,舊嗰架越嚟越少揸,咪賣咗佢囉!」
廿年牌返璞歸真,黃德斌話其實再後生啲時都無揸過快車,「累到人就唔好。」唔係齋講,因為做過受害者,爭啲人車合一,「最難忘十幾年前,喺屯門公路俾架貨車打橫炒埋嚟再撞埋壆,我望過去已經見到道車門摺緊埋嚟,我縮埋一邊縮埋對腳啱啱摺到埋身停咗,真係爭啲無命。最後架車TotalLost,個人就淨係大髀瘀咗。」你咁大隻,唔試吓推開架貨車?黃德斌無理我繼續講,「第二日去驗車處,個警察問我:『架車炒成咁,個司機大唔大鑊?』我答佢我咪個司機囉,佢嚇咗一嚇。」梗係啦,以為撞鬼呀。
■黃德斌話最想有機會可以揸架四驅車穿州過省返大陸,嘩,使唔使咁Man?
「咁我都鍾意揸車嘅。」鍾意揸車揀架SUV嚟試?Sorry,係我衰,就係我呢啲膚淺嘅人搞到粒粒星都話試名牌跑車,「咁男人就梗係會鍾意跑車㗎喇,我都鍾意AstonMartin。」哦,想做占士邦,「今集都係AstonMartin咩?因為我唔鍾意好似林寶拉利嗰啲太誇張,而且林寶嗰啲都揸得幾辛苦……或者Bentley啦,我都鍾意。」唔買番架?「唔買先係DreamCar嘛。」
■一撻車,支針一Fing,搞到架車好Sporty。
■有齊記憶功能真皮電動椅、真皮軚環、側鏡反視鏡、電尾門等等,達豪華級數。
講番架Murano,大隻斌話夠實用,「我都係為咗踩單車方便,佢個尾廂拉個掣就可以校低後座,成架單車掉入去就得。」一隻手指拉個掣,後座校低增加尾廂空間,最犀利係再用一隻手指㩒個掣,後座就自動升番上嚟,又的確方便到震,要讚。
性能呢?「馬力都重要嘅,我唔係要快,而係香港多山路,我又鍾意上山踩單車,最怕架車上山唔夠力。」咁就放心喇,Murano有260匹馬力,仲有AllMode4×4-i四驅系統,因應唔同環境分配前後輪扭力,例如起步時會係前後50:50分佈,市區平路就以0:100,遇到濕地上斜就30:70或者40:60,再配合埋六速XTRONICCVT加減波箱,操控性都幾有保證。試完一轉,「真係唔錯,我鍾意佢唔會好似其他SUV咁,轉彎啷啷吓,但係個避震又係硬,幾舒服。同埋佢3,498cc又咁大部車……」
樣呢?「幾有未來車嘅Feel,個車頭幾靚,同埋𠵱家啲日本車,無論內外都唔輸畀歐洲車喇,而且個尾都唔錯,雙出尾喉又……」
睇嚟,下次喺環保大道撞到佢,都應該揸緊Murano喇……
■平時返工,環保大道泥頭車垃圾車成日霸晒兩條線,令人好嬲,「香港人唔使打燈話Cut就Cut,要改善。」
■校低後座之後,車尾廂可以放到好多嘢,何止一架單車。
■呢個掣,一拉就㩒低,㩒隔籬個掣就升番起,唔使擒高擒低。
■3.5公升V6偈,加速力唔錯,配上電子四驅系統,行車表現令人滿意。
引擎:3,498ccV6CVT
馬力:260ps/6,000rpm
扭力:34.3kgm/4,400rpm
傳動:XTRONICCVT-M6
尺碼:4,825×1,895×1,730mm
售價:$412,800
查詢:合誠汽車(28035333)