萊坊高級董事和估價及諮詢部主管林浩文表示，2017年本港住宅物業升幅約13%，其實升市自2016年年中英國脫歐後開始，去到2017年升勢轉急，幾乎每個月升幅1%，差唔多到今年中才收窄。睇返近年，買樓7成人是用家，3成為投資者，雖然升幅收窄，但樓市上升仍有動力。

他預測：「2018年本港一般住宅升幅5%，但如果經濟穩健，政府又唔搞咩新政策，樓市會升10%。超級豪宅有機會追落後，因為過去一年升幅約5至6%，睇明年升幅約8%。」

被問上升動力在哪？他回應：「不如調返轉講，樓市下跌動力係邊？供應、息口、本港政府政策。明年真係影響樓市，會令樓市向下調整，我諗得政府政策同地緣政治，例如北韓有突發事件出現影響股市，拖累樓市。而家銀行有壓力測試，政策又有辣招，買樓好多係打工仔，如果經濟穩健，外圍無乜特別野，絕對係會繼續入市。」

息口會唔會有影響？「絕對有，不過我地計過數，按揭利率增加1.5厘至2厘，對打工仔來講，壓力較大，較入肉，尤其目前大部份打工仔承造按揭借300至500萬元。不過預期明年本港銀行加息2至3次，加息0.25厘至0.75厘，對明年樓市都唔係好大影響。」他補充，對香港樓市而言，加息短時期影響不大，心理因素大於實際因素，估計加息因素令樓市2018年大跌機會不大。

假設買一層500萬元的樓，借6成按揭即約300萬元，分25年還，息率2.15厘，每月供款12,936元。假如加息2厘，每月供款將增至16,085元，供款增加3,149元。

供應方面，賣樓是發展商主導推盤，估計2.8萬至3萬個單位，但發展商在豪宅區會惜售唔會平，新界區多供應，如將軍澳、元朗、屯門，定價貼市，以貨如輪轉形式去做，明年一手樓主導樓市，雖佔整體3成，但靠一手帶動樓市氣氛。

蘋果財經，關心你飯碗
http://fb.com/appledailyatm