大吉利是！好人好姐做咩扮死人呀！除非係海洋公園主席盛智文啦。盛主席噚日宣傳時又搞嘢，着起壽衣扮死人，仲喺塊面貼兩塊圓形紅紙，搞到自己名正言順成為「鬼佬」一名。工作人員依足傳統畀封利是佢，盛智文用廣東話講：「因為我扮死人，叫利利是是。」班高層前日綵排時誠心拜神，萬聖節期間仲會喺場內扮鬼嚇遊客㖭。

海洋公園日前發生吊車停駛事件，但盛智文話冇影響遊客信心，公園仍然迫爆人，佢透露海洋公園8月份入場人數破咗同月紀錄，有成60萬人次。佢又強調吊車以前都試過短時間停駛，例如畀長者或傷健人士慢慢落車，今次只係停咗8分鐘，而且係個別事件，「如果機電工程署覺得有安全問題，都不會讓我們繼續運作，況且海洋公園十分重視遊人安全。」佢重申事件係皮帶斷裂引致，並已將報告交畀機電署。
身兼澳門永利董事嘅盛智文啱啱喺濠江返港，雖然威尼斯人度假村來勢洶洶，但佢話海洋公園冇有怕，因為嚟緊有好多新景點落成，佢亦好老實，話唔止澳門，其實東南亞地區都越嚟越多新嘢玩，海洋公園都要不斷搞新意思，否則落後於人。