有線四人幫喺2020年最大功勳，當然係鏟起咗《刺針》同搞到有線中國組總辭啦。八方收到風，話人「爛仔」嘅總監陳興昌已經拿拿臨亡「羊」補牢，免得冇咗中國組，冇得報道國家有幾偉大！至於係邊隻「羊」呢？就係現任鳳凰衛視財經編輯嘅陳國揚，同前中央台駐港記者史可為，兩人會去有線幫手「搞」中國組，聽聞陳國揚近日已向鳳凰辭職。

點解會係呢兩位？其實好簡單，兩人喺亞視年代已經跟昌總監搵食。亞視收檔後，陳國揚轉咗去鳳凰衛視，繼續為國家效力。史可為就仲巴閉，當打當紮之年，去咗中央電視台做駐港記者，之後轉行搞生意，做咗好幾年賣日本物業。

兩位高人喺行內有乜威水史？八方問過好多跑慣兩岸新聞嘅行家，答案係「冇」，指陳國揚連每年重頭戲北京兩會都未做過，若做中國組阿頭，證明昌總用人不拘一格眼光「獨到」。史可為曾為央視賣過命，跑遍烽火大地，堪稱深慶得人，不過當時嘅普通話就俾人覺得幾普通。

昌總監除咗被揭識得揼骨減壓，似乎喺前亞視都幾有人面同號召力，所以搵到嘅都係亞視舊部屬。今次重組有線中國組，兩位核心人物來自親共傳媒同黨媒，他日中國組報啲乜？大家都可以想像到，有行家就剝花生指而家好似成間亞視搬去有線，唔知會唔會有亞視嘅收場？永恒不息。

八方向兩位當事人求證過，陳國揚同八方講「冇評論、唔方便」；史可為就暫時未有回覆。

-----------------------------

《蘋果》英文版免費試睇：了解更多

英文版已登錄《蘋果》App，立即下載/ 更新：iOS / Android

-----------------------------

支持蘋果深度報道，深入社區，踢爆權貴，即Like蘋果專題及調查組FB專頁！