墳總說：
「那些年頭，我們希望事情會越做越好。
這十幾年，我們只望事情別越做越糟。」

梁振英管治班底不斷點火頭，不斷搬龍門，不斷轉fo，令市民疲於奔命。剛鬼祟任命李國章出掌港大校委會主席，然後李波被失蹤、被平安、被傅真。在網絡23條再次準備修訂二讀前夕，突然跑出一個零票當選的立法會議員，胡說八道然後成功轉fo。

銅鑼灣書店店長林榮基，兩個月前已失蹤，林榮基妻子到警署報案，報案後數小時，即收到父親來電報平安。一收線，警方就打嚟問林榮基是否曾致電返屋企，知道有喇，警方就指「因已報平安，不算失蹤人口」，想closefile。

政府點火頭，警方又嚴正執法、無意識揮動「手臂延伸」。香港市民可以找誰來保護？一張護照？英國領事館？白宮聯署？

卓韻芝噚日喺fbpost咗段感想，講到因為李波等五人「被失蹤」事件好恐怖，令香港人驚覺：「呢度根本就係大陸，呢度……已經係大陸。」佢覺得大家0依家都唔知點好，直言：「外面有冇人可以幫吓我哋？因為我哋真係唔知點好。」

「唔止小市民，而係連官員都唔知點好；政客嘅回應，或者警方嘅回應，意思大約都係『......唔會吖嘛？就算係都咩啦......應該唔會嘅』或者『唉咁人哋唔覆，我哋都冇辦法㗎......』就好似呢件事都令佢地堂一堂；其實大家都唔知點好。

「有人自發用外語講述呢件事，然後上載，希望得到其他國家關注，實在好好，好感動，但說到尾，感受都係：外面有冇人可以幫下我哋？因為我哋真係唔知點好。

「咁講，好似好消極，不過都係要首先承認：其實我哋覺得好無助，我哋切切實實感受到，以前聽落一啲荒誕嘅嘢，今日發生喺呢度。香港……呢度仲係咪香港？」

「但願大家唔好認為呢件事係『個別事件』——喺司法同執法上，如果成日講『個別事件』，咁即係冇法冇律啦。有人覺得『唔關自己事，自己又唔係賣書』，但今次嘅『唔知點好』，正正反映一個司法、執法有問題、冇嘢叫『正路』嘅社會，到底係點嘅。你驚俾人告？吓？你仲信『告』呢樣嘢？唔會啦！你會直接失蹤。」

去到文尾，阿芝話：「希望官員們奮力調查事件。見到被失蹤、被傳真，對於政府嘅要求，我哋已經降到最低，都唔講咩福利，定有冇樓住添喇，我哋只希望去番最基本嘅：被保護。因為最終極保護到你嘅嘢，唔係你阿媽，或者你份工，或者錢，而係法律。冇法律，你阿媽想保你都保唔到。」

唔好放過立法會今日繼續審議嘅版權修訂條例草案（俗稱「網絡23條」）。