容祖兒今日喺跑馬地馬場出席馬拉松起步禮，同場仲有林海峰、葛民輝、森美、小儀等一眾商台DJ。活動中，祖兒即場示範熱身運動。

商台噚日公佈「叱咤樂壇我最喜愛的男、女歌手、組合」最後五強（新聞連結： https://bit.ly/2BJLWEZ ），提到「我最喜愛的男歌手」最後五強有古天樂、陳奕迅、張敬軒、周國賢同陳柏宇之爭，鬥爭激烈。

祖兒話：「最開心就係有古仔，好開心有呢個畫面，我都好想投票，我將女歌手嗰票投埋畀佢。」問佢想聽古仔唱咩歌？祖兒笑住話：「求其啦，《今期流行》係必殺！我係第一個喺廣告話『我要聽古天樂唱歌』，點知我講中咗，我覺得好靈驗。」怕唔怕古仔唔出席？祖兒表示如果唔去，拍片都好吖！雖然祖兒力撐古仔，不過講到陳奕迅同張敬軒都係佢好友，祖兒話：「個個都friend，冇所謂啦，但今年最想睇就係古仔，張敬軒大把路行啦！我o依家眼睛想睇嘢。」

祖兒指古仔作為演藝人協會主席，應該要涉足歌唱界、影視圈，今次係一個好好嘅機會，可以企喺1月1日叱咤頒獎禮上，講下來年對於音樂界嘅諗法，然後再送大家一首歌，簡直係完美。想唔想同古仔合唱？祖兒笑住話：「睇下主席有咩差遣，睇下有冇時間。」祖兒仲呼籲一齊為古仔集氣。

至於已故嘅盧凱彤有份入圍女歌手，五強入面仲有祖兒、謝安琪、衛蘭、Gin Lee，問祖兒會唔會想盧凱彤攞多過自己攞？祖兒諗咗諗，然後話：「所有嘢都喺心，大家對佢嘅思念喺呢度都睇得到，所以……一切喺心裏面。」講到祖兒多年有份入圍女歌手，佢表示：「多謝大家支持我，得唔得都冇乜所謂，最緊要大家心裏面有我嘅位置，咁我就心滿意足。」

此外，提到楊政龍最近經常喺Instagram上載同祖兒嘅合照，祖兒話：「我哋好friend，係一家人。」但好多係攬攬相，祖兒笑指懷疑楊政龍有戀母狂：「你哋係咪冇新聞？我睇住佢大㗎！」接唔接受姊弟戀？佢話：「唔好搞呢啲，佢大把前途，人哋情路上一片光明。」

精選娛聞，喺晒《娛果》
http://fb.com/appledailyent