今時今日，勞動節遊行齋嗌口號係未夠㗎，有人嫌特色道具都未夠力表達訴求，不惜扮鬼扮馬博君一笑，又或者苦笑。職工盟領頭遊行嘅「人肉榨汁機」驚嚇度爆燈，仲有老闆半邊面爛溶溶，拖住個得番半條命嘅打工仔出巡，但點都唔及工聯會嘅凸腩超人同黑白無常咁恐怖，八方仲以為自己去咗哈佬喂大巡遊！

Round 1兩大工會鬥驚嚇，職工盟派出扮半人半鬼嘅老闆上陣，示威者自白，佢哋一向都係一面係人一面係鬼，「對住外面就用人話、講到好偉大；內心就好似惡魔咁壓榨工人」。工聯會就派出清潔工扮黑白無常，日光日白見到都覺得好邪。白無常高先生話，佢要控訴輪更制令工作時間日夜顛倒，試過連續工作逾20小時。
Round 2就鬥超能力。工聯會兩個區議員同兩個會員成立超人戰隊，矢言打救打工仔女。其中一位超人係觀塘區議員何啟明，曾經扮過火影忍者佐助，佢講明唔怕又俾網民恥笑，「最少令佢哋反省有呢件事存在」。
職工盟就有甄小姐扮老虎，佢話𠵱家交通費加價加到離晒譜，成三分一人工用嚟搭車，人工又唔見加得咁快。調理農務蘭花系直頭成個靈堂搬出嚟，一身喪服、捧住良心神主牌，寓意老闆良心已死，仲告誡老細們「埋沒良心、聽勾脷筋」，醒定啲喇李老闆。

mailto:[email protected]