林保怡同周家怡之前為ViuTV拍攝《瑪嘉烈與大衛系列 綠豆》，近日舊街場白咖啡亦搵咗保怡同家怡拍咗個新廣告，點知照dup咗《瑪》劇中嘅造型同演繹方式、拍攝手法，據悉ViuTV覺得此舉被侵犯版權而極為憤怒，準備向相關人士採取法律行動(新聞連結： http://bit.ly/2eidbwW )。

林保怡接受《蘋果》訪問時表示:「如果我嚟緊有一個電影劇本又係揸的士，咁有少少出事？咁又要搵律師研究吓我呢個電影劇本呀？」個廣告寫住第27集，連音樂同間屋都同《瑪》劇一樣，保怡解釋:「係呀，間屋靚吖嘛佢哋覺得！」

但成件事冇知會ViuTV，令ViuTV覺得被侵權，保怡就話:「成件事一定要知會ViuTV，因為係出邊嘅嘢嚟㗎嘛，一個客同一個廣告agent想咁做，我哋完全唔係瑪嘉烈與大衛，佢哋個構思唔係瑪嘉烈與大衛。版權問題要ViuTV同廣告客戶研究番，我哋呢小小演員好被動。」

對於廣告今日抽起咗，保怡又話:「o依家係爸爸媽媽講嘢嘅時候，等爸爸媽媽傾掂數先啦，媽媽plan咗好多計劃去宣傳，o依家爸爸話唔得，又唔知會唔會另生枝節呢。」會唔會唔開心？保怡:「唔會，邊度有啫？最緊要公平公正。」