【更新內容】《叮噹》係唔少人嘅童年回憶，《多啦A夢》都深受現今細路歡迎，多年來電影、電視動畫長拍長有，幾年前TOYOTA以真人版拍成廣告系列，由尚連奴、妻夫木聰、山下智久、水川朝美、前田敦子等攜手合作，喺亞洲區一度掀起話題。

《多啦A夢》近日宣佈將電影版《大雄動物惑星之謎》搬上舞台，由22歲男模小越勇輝飾演大雄，舞台劇版大雄一改以往形象，仲六四分界，望落都幾靚仔。而演過日劇《花樣少年少女》嘅舞台劇演員陳內將，都化身型仔版小夫。 至於靜香，由人氣女子組合乃木坂46嘅19歲成員樋口日奈飾演，肯定又吸引一班男粉絲捧場。多啦A夢就會照例由演員着公仔衫上陣，水田Wasabi負責聲演，呢個舞台劇將於3月26日開鑼，直至4月2日分別喺東京、福岡、愛知、宮城、大阪公演。

另外，《多啦A夢》安排下月上映嘅全新大電影，會由平井堅唱出主題曲，其單曲封面更會同「叮噹」大玩crossover變身喵星人。