「鷹眼」謝洛美維納（Jeremy Renner）今日喺澳門出席國際影展，今年7月謝洛美接受《蘋果》專訪時已經預告會出席，當時佢仲話過拿到一個為期十年嘅中國簽證，嚟緊有好多機會喺亞洲同fans見面。（新聞連結： http://bit.ly/2kaaYTS ）

難得嚟到澳門，呢次謝洛美擔任電影節推廣大使，於紅地毯上接受司儀訪問，就透露係幾小時前先抵達，佢話：「印象好閃，因為好多燈光，好吸引，但暫未有時間四處逛。」睇嚟謝洛美呢次澳門之行未有機會睇夜景，唔似得上年尾咁，喺香港出席完活動後有謝婷婷陪住騎Harley電單車四圍去，慢慢就有好多兩人拍拖嘅消息傳出。

不過謝洛美喺之前嘅訪問將緋聞女友謝婷婷降格為「朋友」，而謝洛美今日已事先表明唔接受訪問，會等聽日出席大會活動先再同傳媒詳談，想聽聽佢哋感情發展就要等多日。而呢次澳門國際影展今年共有9部來自以色列、大陸、英國、阿根廷等地嘅電影進入競賽單元，頒獎禮會於本月14日喺澳門文化中心舉行。

更多娛聞，喺晒《娛果》
http://fb.com/appledailyent