噚日李蘊同「Ecup超蓮」鍾采羲（Iris）喺沙田做內衣模特兒，唐貝詩同徐靜雯現身捧場。首次行內衣騷嘅李蘊表演淡定，佢話見到咁多人喺樓上高炒影相，已做足安全措施。問李蘊行騷前有冇問准台灣魔術師男友劉謙？佢話：「係發展中嘅好友啫，係工作佢都支持，佢想我多啲自信，但唔會影相畀佢睇。」

Iris就化身只着內衣嘅新娘，波濤洶湧，講到同門嘅陳靜（DaDa）傳同富二代拍拖，Iris話：「未同DaDa聯絡，個男仔幾靚仔，替佢開心。」但DaDa曾經講過唔同富二代發展，Iris幫口話：「未知個男仔背景，可能佢靠自己努力，加上有好多嘢冇得揀，如果係事實會祝福佢。」講到自己，Iris話：「我dry咗好耐，希望身邊男性朋友主動啲。」

另外，唐貝詩被問到有消息話周杰倫（Jay）力追佢妹妹唐貝欣，唐貝詩話：「應該係普通朋友，唔清楚，唔方便代答。」講到話Jay同唐貝欣一齊睇首映兼唱K，唐貝詩話當日係公關邀請出席，有大班人一齊。問唐貝詩會唔會叫妹妹避忌啲？佢話：「都會，邊個性格夾咪先做朋友。」唐貝詩話妹妹拍拖一定要問准佢同媽咪，所以佢相信Jay同妹妹只係朋友。