中港股連日洗倉潮，去到星期三跌市當日，稍為具防守性嘅股份，公用股、本地電訊股之類，全線向上突破，即市避險情緒到達頂點。結果喺星期四，港股就出現報復式反彈，當然中美再埋枱傾好似係好消息，但絕地反彈絕對要超賣狀況出現嚟配合。

今日進入短期雞犬皆彈，難以判斷反彈延續性，亦難以從單日走勢上辨別股份未來強弱。反而回顧之前一段日子，如果有股份有壞消息而冇被洗倉，或許被視為市場惜售嘅股份，可見將來會偏強。

美團同小米差唔多，市值大概4,000億左右，以佢嘅已有客戶基礎同服務範圍，要大幅提升變現能力，喺旅遊業務表現停滯情況嚟睇，也許不易。而美國上市京東市值亦只係低於美團小米些少，可概括為同一梯隊。佢哋共通點係有Niche之餘，喺中國某個界別擁有以億計客戶數字，有收入模式但盈利增長方程式未確立，若成功提升變現能力，每年盈利過百億計，就可以支撐更高市值，京東就做極都做唔到了。

亞馬遜多年來都想進軍藥品銷售，可知潛力有幾大。睇內地線上醫療搞到一劈屎，但阿里健康（241）背靠天貓，再加上餓了麼運送團隊，有客戶基礎亦有貨源，暫時唔撈醫、只撈藥似乎係出路，收入模式剛起步，市值724億，相對美團之類，似乎更有上升潛力。

晉佳

https://www.facebook.com/advanceguy1