劉偉強、葉偉信、麥兆輝同黃進等11位香港著名導演，今日齊集牛頭角出席香港電影導演會主辦嘅「電影導演教室」課程計劃記者會，身為導演會會長嘅劉偉強會擔任校監，而李英洛導演就係校長，呢個為期7個月嘅導演課程，目的係希望培育更多香港嘅年青導演，咁多位「星級導演」同時會充當客席導師，同學生分享交流，劉偉強除咗做校監，當然都會任教，佢話：「教室已經係好多屆，我哋需要年青人入行，今次入學嘅準則高啲，招收有拍片經驗、或者喺行內做緊嘢，唔係一張白紙，我哋會喺30個學生選10個優秀嘅，畀10萬蚊佢哋製作一條20分鐘嘅短片，而課程中最優秀嗰個，我哋會保薦佢拍政府資助嘅劇情片，我哋嘅導演會做監製。」

劉偉強話學生可以透過呢個計劃吸收唔同導演嘅經驗，無論學院派同實戰派嘅嘢都能夠學到，係好難得嘅機會。而問到葉偉信有啲乜嘢貼士可分享？佢笑話：「我應該自己嚟讀。我覺得最緊要有心，我作為導師主要都係分享。」劉偉強就補充話除咗有心，都要有天份同熱愛電影，仲話依家嘅電影業波濤洶湧。

另外，講到聖誕，劉偉強就話今年會一家人去芬蘭睇北極光，佢話：「成家一齊去凍吓，未去過㗎，都期待，小朋友細細個就暑假去旅行，大大吓就少啲，依家個女走埋(赴美留學)，應該每年都要gathering，老婆話驚遲啲仔女都唔會跟我哋出去。」

攝影：羅慧敏