這晚谷草鬥得最激係騎師王，第八場三班1200米開跑前，雷神、田泰安同蔡明紹各有兩Win，雷神另加一季合共28分領先，女將蔣嘉琦則揸住一冠一季累積16分。
如果尾場雷神、田泰安同蔡明紹都冇三甲，而嘉琦妹勝出的話，嘉琦就可以同雷神共同封王。好可惜呢個歷史性鏡頭只係實現咗一半，今場蔣嘉琦夥拍師傅呂健威的「威威寶貝」直路中段仍唔見影，遲遲才撻着，最後百幾米從大外欄一攻而破，反先原本走甩咗以為贏梗之「光芒再現」，6.5倍綠燈Win順利開出，幫落飛黨食番個尾糊，組合獨贏A2派26元正。
「光芒再現」衰收尾屈居亞軍，今季四捷落空。嘉琦妹全晚贏「滿貫豐采」、「威威寶貝」在港處女起孖，揸住兩冠一季共28分，都唔可以首勝騎師王，只怪雷神呢場冇錫身，騎「舞林高手」臨尾殺上跑第三，令佢最終拎到兩冠兩季共32分，以四分之微氣走嘉琦妹重奪騎師王。第四名為蔡明紹「段段有」，四重彩派近七千蚊。