車路士上星期六喺英超作客以4:0大勝史篤城，艾華路莫拉達同柏度洛迪古斯包辦咗四個入球，球隊今季喺英超暫時入咗12球，當中有10球都係由西班牙球員射入，而喺對史篤城嘅比賽兩度助攻畀莫拉達嘅艾斯派古達，暫時就以四次助攻成為車仔今季助攻王，可見雖然迪亞高哥斯達落咗「車」，西班牙球員依然係車仔嘅一股勢力。

車路士今季喺英超暫時入咗12球，其中有10球係狂牛兵所入，佔咗83.3%，入波嘅包括入咗六球嘅莫拉達、入咗兩球嘅馬高斯阿朗素，仲有各入一球嘅法比加斯同柏度洛迪古斯，至於佢哋最近入嘅16球當中，就有15球係西班牙球員射入或者貢獻助攻，證明狂牛兵喺車仔幾咁有影響力。

值得一提係，交出咗四次助攻嘅艾斯派古達今季喺英超助攻排名榜暫列第3，僅次於大衛施華同米希達利恩，佢四次都係助攻畀莫拉達射入，亦令佢哋成為今季歐洲五大聯賽最有效率嘅組合。