由碌架床改裝成嘅單車,大家敢唔敢踩出街?呢架《夢遊號》唔係用嚟外出代步㗎,而係香港當代藝術獎2012得獎作品之一,藝術家黃國才接受政府新聞網訪問時話,喺紅色鐵造嘅碌架床,配上車輪裝置,原來係想表達用嚟瞓覺嘅床,加咗車輪會不由自主向前滾動,就好似唔少港人埋首工作,冇真正休息時間咁,提醒大家唔好只顧工作,而忘記生活本身嘅意義。
黃炳培(又一山人)嘅作品《無常》,表面睇嚟係最普通不過嘅梳化同茶几,組合後其實係一副棺材,無非想引發市民以另一角度思考死亡。徐沛之就筆走龍蛇,以草書寫咗流行曲《陀飛輪》嘅歌詞,獲青年藝術家獎。查實香港當代藝術獎2012共97件得獎同入圍作品,𠵱家起至明年1月5日喺香港藝術館展出,市民可以入場慢慢細賞。
mailto:
[email protected]